Gwamnatin Jihar Bauchi ta shirya fara daukar ma’aikatan gwamnati 5,669 cikin aikin gwamnati na jihar, a matsayin wani bangare na alkawarin daukar ma’aikata 10,000 da gwamnatin ta dauka tun da farko.
Gwamnan Jihar Bauchi, Sanata Bala Mohammed, ne ya bayyana hakan a wani taron masu ruwa da tsaki da aka gudanar domin tabbatar da adalci, gaskiya da daidaito a aikin daukar ma’aikatan a fadin jihar.
Tun da farko, Gwamna Bala Mohammed ya yi alkawarin daukar ma’aikatan gwamnati 10,000 domin cike gibin karancin ma’aikata da ake fuskanta a bangaren aikin gwamnati na jihar.
Wannan alkawari ne ya sa Gwamnan ya kira taron masu ruwa da tsaki daga kananan hukumomi 20 na jihar, domin tantance guraben aiki da ke akwai tare da cimma matsaya kan hanyoyin da za su tabbatar da gaskiya da sahihancin aikin daukar ma’aikatan.
Gwamna Bala Mohammed ya bayyana cewa gwamnatin jihar ta gano rukunin ayyuka 214, tare da guraben aiki 5,669 a fadin ma’aikatu, sassa da hukumomi (MDAs) 18 na jihar.
Ya kuma yi kira ga kungiyoyin masu ruwa da tsaki hudu da suka halarci taron da su ajiye bukatun kashin kansu a gefe, tare da kaucewa duk wani abu da zai iya lalata inganci da sahihancin aikin daukar ma’aikatan.
Haka kuma, Gwamnan ya tabbatar wa al’ummar jihar cewa za a cike sauran guraben aikin a shekara mai zuwa, inda ya ce tuni gwamnatin ta kammala nazarin kudade da ake bukata domin tallafa wa karin daukar ma’aikatan.
