Gwamnatin Jihar Bauchi ta bayar da umarnin rufe dukkan makarantu a fadin jihar nan take, sakamakon samun karuwar barazanar tsaro.
Wannan umarni na kunshe ne a cikin wata sanarwa da Jami’in Hulda da Jama’a na Ma’aikatar Ilimi ta Jihar Bauchi, Jalaludeen Usman, ya fitar, inda ya bayyana cewa rufewar ta shafi makarantu na firamare, sakandare da manyan makarantu—har da na Gwamnatin Tarayya da kuma na kashin kai.
Sanarwar ta ce an dauki wannan mataki ne bayan dogon shawara da nazari kan halin da ake ciki a bangaren tsaro. Ta kuma bayyana cewa ko da yake matakin zai iya kawo cikas ga wasu al’amura, amma lafiyar dalibai, malamai da ma’aikatan makarantu shi ne babban abin da gwamnati ke dora muhimmanci a kai.
Gwamnati ta roki iyaye, masu kula da dalibai, da masu makarantu su kwantar da hankalinsu tare da baiwa hukumomi hadin kai, domin jami’an tsaro na ci gaba da aiki ba dare ba rana wajen shawo kan matsalolin.
Sanarwar ta kuma bukaci al’umma su kasance masu lura da hankali, tare da gaggauta kai rahoton duk wani motsi ko mutum da suke zargi, domin hakan yana da muhimmanci wajen kare rayuka da dukiyoyi.
Gwamnatin Jihar Bauchi ta ce za ta ci gaba da fitar da sabbin bayanai yayin da al’amura ke ci gaba da gudana.
