A wani muhimmin sabon ra’ayi da ya taso a fagen tattalin arziƙin ƙasa, masanin tattalin arziƙi Daramola Omoyele ya shawarci Gwamnatin Tarayya da ta haɗa cibiyoyin addini – ciki har da masallatai, cocinai da sauran wuraren ibada – cikin tsarin biyan haraji a faɗin Najeriya.
Omoyele ya bayyana cewa wannan mataki zai taimaka wajen faɗaɗa hanyoyin samun kuɗin shiga ga gwamnati, musamman a wannan lokaci da tattalin arziƙi ke fama da ƙalubale. Ya ce akwai cibiyoyin addini da shugabanninsu da ke samun kuɗaɗe masu yawa, amma ba sa shiga tsarin haraji, alhali talakawa da ‘yan kasuwa na biyan haraji akai-akai.
A cewarsa, wannan tsarin zai iya kawar da rashin daidaito tsakanin jama’a idan aka aiwatar da shi cikin gaskiya da adalci. Ya kuma jaddada bukatar gwamnatin ta tabbatar da tsauraran matakai wajen yaƙi da rashawa da inganta gaskiya a hukumomin tattara haraji, domin kada sabuwar doka ta zama nauyi ba tare da amfani ga ƙasa ba.
Idan aka amince da shawarar, akwai yiwuwar hakan zai sauya yadda cibiyoyin addini ke gudanar da harkokinsu, tare da ƙara samun kuɗin shiga ga gwamnati.
Za mu ci gaba da kawo muku sabbin bayanai kan wannan lamari yayin da yake cigaba da jan hankalin jama’a.
